Zëvendësministri prof. dr. Bashkim Musliu është larguar nga partia NISMA Socialdemokrate. Lajmin e ka bërë publik vet prof.Musliu, përmes një postimi ku shkruan:
Të nderuar qytetarë, të nderuar bashkëpartiakë Para pak kohësh, publikisht, kam shprehur mospajtimin me koalicionin NISMA-AKR. E kam quajtur miqësi me Jovan Bregun.
Mendoj se NISMA është dashur të shkojë e vetme në këto zgjedhje me qëllim që ta fuqizojë emrin dhe identitetin e saj. Në fund të fundit, siç është thënë, më e mirë është një humbje e ndershme se sa një fitore e turpshme.
Intelektuali duhet t’i ketë parimet e tij mbi çdo interes të partisë dhe kurrë nuk duhet të shkrihet plotësisht në asnjë parti. Duke u nisur nga këto parime do t’ia mbajë fjalën vetes ( duke u kërkuar falje të gjithë shokëve që janë në NISMA edhe për shkakun tim) duke qenë i vetëdijshëm se më së vështiri është t’ia mbash fjalën vetvetes.
Të nderuar bashkëpartiakë siç e dini unë kam shprehur haptazi qëndrimin tim refuzues lidhur me koalicionin e lartpërmendur. Përveç kësaj pritjet e mia ( nuk është fjala për pritjet në aspektin personal ) nuk janë përmbushur ashtu siç kam menduar. Ndoshta edhe për arsye se pritjet kanë qenë më të mëdha se sa është dashur. Fjala është veçanërisht për votimin e demarkacionit ndaj të cilës NISMA është dashur të mbajë tjetër qëndrim.
Duke mos u pajtuar me koalicionin, sepse mendoj se është i dëmshëm; duke mos u pajtuar edhe për mënyrën se si është bërë ky koalicion dhe për shkak se nuk janë përmbushur pritjet e mia në kuptimin e përgjithshëm që nga sot largohem nga NISMA.
Me këtë rast i falënderoj të gjithë bashkëpunëtorët e mi duke ju uruar shëndet dhe suksese në jetë! Miqësisht, Bashkim Musliu
