Sot nëpër media është raportuar se të hënën AAK do ta zyrtarizojë koalicionin me PSD-në. Në lidhje me këtë, janë prononcuar nga vetë partia e Ramush Haradinajt.
Në një prononcim për Gazetën Blic, deputeti i AAK-së, Shkumbin Demaliaj, ka thënë të mos jetë në dijeni për një gjë të tillë, teksa ka pohuar se të hënën do të mbahet takimi i Këshillit Drejtues të AAK-së.
Ai nuk e ka mohuar mundësinë e një koalicioni të tillë.
“Nuk jam në dijeni për një gjë të tillë, nuk ka diçka zyrtare, mirëpo të hënën do ta mbajmë mbledhjen e Këshillit Drejtues, organit më të lartë të partisë, aty ku merren vendimet dhe për gjithçka do të merret vesh”, ka thënë Demaliaj.
Gazeta Blic nga burime të saja brenda AAK-së, merr vesh se ka përafrim të qëndrimeve ndërmjet dy partive.
“Ka përafrim të qëndrimeve ndërmjet dy partive. Të hënën pas mbledhjes së Këshillit Drejtues, mund të zyrtarizohet koalicioni me PSD-në”, tha ky burim.
Ndërkaq, vetë Ahmeti e ka pranuar se ka pasur takime me Fatmir Limajn e Ramush Haradinajn./Gazeta Blic
