Nga erërat e forta dhe shtrëngata e së mërkurës në Gjilan janë dëmtuar 7 vetura, disa shtylla elektrike, si dhe tezgat e bujqve te “Bunari i Përlepnicës”, tha Sami Spahiu nga Drejtoria për Mbrojtje dhe Shpëtim në Gjilan.
Sipas Sami Spahiut, ekipet e zjarrfikësve dhe të shpëtimit kanë intervenuar në katër raste: në largimin e një lisi në Lagjen “Dardania”, në sanimin e një kablloje të kompanive të internetit, në largimin e një shtylle elektrike nga rruga në Lagjen “Arbëria” dhe në shuarjen e një zjarri në orë elektrike në një shtëpi në Lagjen “Arbëria”.
“Deri më tani kemi disa shtylla elektrike të dëmtuara nga erërat dhe shiu që ra pasditen e 14 gushtit dhe, sipas të dhënave, deri më tani kemi 7 vetura të dëmtuara, 6 tek ish parkingu “Eco-Higjiena” dhe një tek banesat e Tregut të Gjelbër, një lis i thyer në Lagjen “Dardania”, shtylla elektrike të dëmtuar afër SFK dhe në Lagjen “Arbëria”, një kabllo në rrugën e Prishtinës, disa tezga të bujqve te Bunari i Përlepnicës”, ka thënë për Rajonipress Sami Spahiu, drejtor i Mbrojtjes dhe Shpëtimit në Gjilan.
