Me datën 3 Gusht strukturat e Lidhjes Demokratike të Kosovës zgjodhën për të tretën herë në krye të LDK-së Isa Mustafën.
Mustafa, arriti të rimarrë postin e të parit të partisë me aklamacion pas shumë problematikave me të cilat u shoqëruan zgjedhjet në këtë parti.
E kritika të forta dhe pakënaqësi erdhën nga përfaqësues të kësaj partie, pas rizgjedhjes sërish në krye të saj të zotit Isa Mustafa.
Njohësi i çështjeve politike në vend Nexhmedin Spahiu në një prononcim për Gazeta Blic thekson se LDK-ja, me rizgjedhjen e Isa Mustafës në krye të partisë ka dëshmuar se nuk mund të dalë nga kthetrat e PDK-së.
Spahiu thotë se me këtë vendim që strukturat e LDK-së kanë marrë dje, do t’u kushtojë shumë shtrenjtë në elektorat.
“Zgjedhja e Isa Mustafës në krye të LDK-së do të thotë se LDK-ja nuk po mundet të dalë nga kthetrat e PDK-së. Elektorati e kupton këtë gjë dhe sigurisht me këtë vendim që kanë marrë dje, pra me rizgjedhjen sërish në krye të kësaj partie të Z. Isa Mustafa, LDK-ja në zgjedhje nuk mund të dalë parti e parë.Në rast se do të fitonte ndonjë kandidat më i ri në LDK, do të ishte kjo parti fituese e zgjedhjeve por tanimë këto gjasa nuk ekzistojnë më. Në zgjedhjet e ardhshme ka shumë mundësi që parti e parë të dalë Lëvizja Vetëvendosje” ka thënë Spahiu për Gazeta Blic.
