Sot në selinë e Federatës së Futbollit të Kosovës është hedhur shorti për edicionin e ardhshëm të Ipko Superligës së Kosovës, që do të fillojë më 17 gusht.
Feronikeli do ta nisë sezonin e ri të Superligës së Kosovës në shtëpi, me ndeshjen kundër Drenicës, ku do të tentojë që ta dëshmojë synimin për ta mbrojtur titullin e kampionit qysh nga fillimi, shkruan Gazeta Express.
Në anën tjetër, Prishtina synon të shkojë një hap më tutje sesa vitin e kaluar, kur mbeti nënkampione. Sfidën e parë në rrugën drejt trofeut të këtij sezoni do ta ketë pikërisht kundër rivalit të qytetit, Flamurtarit.
Në anën tjetër, nga dy klubet e promovuara nga Liga e Parë për sezonin 2019/20, Dukagjini do ta nisë sfidën në nivelin e parë të futbollit kosovar në shtëpi, me ndeshjen kundër Ballkanit, ndërsa Vushtrria do të udhëtojë në Podujevë për përballjen me Llapin.
Rezultate të mira në xhiron e parë do të tentojnë të marrin edhe klubet e tjera, si Drita që përballet me Ferizajn dhe Trepça ’89 me Gjilanin.
Lista e plotë e ndeshjeve të xhiros së parë:
Flamurtari – Prishtina
Drita – Ferizaj
Dukagjini – Ballkani
Feronikeli – Drenica
Llapi – Vushtrria
Trepça ‘89 – Gjilani
