Kryetari i PDK-së në Skenderaj, Sami Lushtaku ka reaguar lidhur me raportimet në media se mund të përjashtohet nga partia pasi që ka probleme me ligjin, duke thënë se ka vetëm një aktakuzë e cila nuk ndërlidhet me krim apo korrupsion.
Lushtaku, thotë se janë 4 ose 5 persona të cilët sipas tij e kanë bllokuar PDK-në dhe tërë Kosovën, persona këta të cilët duhet larguar nga partia.
“Nga partia duhet të largohen e të përjashtohen me turpin më të madh 4-5 persona, të cilët e kanë bllokuar Kosovën e PDK-në dhe të cilët kontrollojnë çdo gjë në Kosovë, drejtësinë, biznesin, mediat dhe sferat tjera vitale të vendit tonë, gjë që për veprimtaritë e tyre të pista dhe rrjetet që kanë ndërtuar janë të mirëinformuar edhe miqtë tanë ndërkombëtarë”, ka thënë Lushtaku.
E ndaj këtij reagimi të Sami Lushtakut, ka reaguar edhe kryetari i Lvëizjes vetëvendosje në Skënderaj, Hysni Mehani.
Sipas Mehanit, nëse Sami Lushtaku nuk është në 4-5 e parë, atëherë në 11 e parë është gjithsesi.
“Erdhi dita me e citu Sami Lushtakun. Kijameti nuk është larg. Veç nëse Samiu nuk është në 4-5 e parë, atëherë në 11 e parë është gjithsesi”, ka shkrura Mehani./DrenicaPress
