Një lokal është djegur gjatë orëve të mbrëmjes në qendër të Prishtinës, saktësisht në vendin e quajtur “te kafet e vogla”.
Rastin e kanë konfirmuar edhe nga ana e Qendrës Emergjente të Zjarrfikësve, të cilët kanë thënë se kanë marrë informatë në ora 22:00 për një djegie të një lokali në Prishtinë.
Sipas tyre, dyshohet se zjarri ka ardhur si pasojë e problemeve me energji elektrike që kishte ky lokal, raporton gazetablic.
“Në ora 22:00 kemi marrë informacionin se një lokal është djegur në rrugën Fehmi Agani, përball Ambasadës së Kroacisë, në Prishtinë. Ekipet emergjente të zjarrfikësve kanë dalur në vendngjarje dhe po merren me rastin. Tani për tani dyshohet se zjarri ka ardhur pasi që i njëjti lokal dyshohet të ketë pasur probleme me energji elektrike”, thotë Qendra Emergjente e Zjarrfikësve në Prishtinë.
