Zëdhënësja e Ministrisë së Jashtme ruse, Maria Zaharova e ka quajtur “akt të egër” dhe “manifestim të politikave provokuese të shqiptarëve të Kosovës” arrestimin e shtetasit rus, Mihajl Aleksandreviq Krashnoshenkoviq në veri të Kosovës.
Ajo njëherit i kërkoi UNMIK-ut të ndërmarrë hapa për lirimin e tij.
“Arrestimi është kryer pavarësisht nga fakti se një qytetar rus ka imunitet diplomatik si një zyrtar i OKB-së,” tha Zaharova.
Ajo theksoi se Rusia kërkon që udhëheqja e UNMIK-ut të sigurojë informacion të detajuar në lidhje me “arrestimin e paligjshëm” të tij.
Zaharova më parë ka thënë se Moska zyrtare beson se aksioni i forcave speciale të Kosovës në komunat serbe në veri të Kosovës dhe arrestimi i serbëve është një “provokim i ri i Prishtinës, me qëllim për të trembur dhe dëbuar popullatën jo-shqiptare dhe për të detyruar vendosjen e kontrollit mbi atë zonë”, transmeton Klan Kosova.
