Presidenti i UFC-së, Dana White, u ka dhënë shpresë fansave të UFC-së për të parë një tjetër duel mes Conor McGregor dhe Khabib Nurmagomedov.
Numri 1 i arteve marciale mikse shpreson që një ditë dy sportistët të respektojnë njëri-tjetrin, çka do ta bënte të mundur revanshin mes tyre.
“Kam frikë se ata të dy nuk do t’ia japin kurrë dorën njëri-tjetrit, të bëhen miq dhe të hanë një darkë së bashku. Megjithatë, kur ngjitesh në kafaz dhe duelon me një rival duhet në radhë të parë të respektosh atë që ke përballë.
Unë besoj se një ditë do të arrijmë në këtë pikë, që ata të dy të respektojnë njëri-tjetrin dhe të realizojmë revanshin. Nuk ka rëndësi nëse e duan apo jo njëri-tjetrin, rëndësi ka që ata të respektojnë njëri-tjetrin si rivalë”, tha Dana White.
Sfida e parë mes dy sportistëve, zhvilluar në tetor të vitit të kaluar (UFC 229), u fitua me “submission” në raundin e katërt nga Khabib Nurmagomedov.
Ai mbrojti titullin kampion bote të peshës së lehtë, ndërkohë që më pas nisi një sherr masiv edhe mes stafeve të dy sportistëve. Të dy sportistët u pezulluan, McGregor 6 muaj e Khabib 9 muaj. /Telesport/
