Presidenti Hashim Thaçi, deri më tani është duke e “marrë në pyetje” Komisionin, e jo Komisioni atë.
Presidenti fillimisht kërkoi të verifikohet prezenca e të pranishmëve, duke kërkuar qe deputetët të prezantohen me emra dhe mbiemra, raporton Koha Ditore.
Tani po kërkon që të dijë se kush është eksperti që e ka hartuar draft-raportin.
Presidenti është duke refuzuar të vazhdojë mbledhja me intervistimin e tij pa e pranuar këtë përgjigje.
Këtë, po thotë se ia garanton pozita e tij e presidentit, si dhe pozita e komandantit Suprem të FSK-së.
“Unë respektoj çdo deputetë, ka qenë unanimitet që të ndodhë ky komision. E vlerësoj lartë interesin kombëtar nga secili prej jush. Kam të drejtë ta kontestojë ekspertin, kush është ai?”, pyeti Thaçi.
Ndërkaq, Hajdar Beqa nga PDK, tha se eksperti është propozuar nga Xhelal Sveçla.
“Nuk e kemi dit çka punon, a punon për ndonjë agjenci. Veç e dimë që ka punuar te Avokati i Popullit”, tha ai.
Ndërkaq, deputeti i PSD-së, Frashër Krasniqi tha se presidenti paska shkuar në Komision për të bërë pyetje e jo për t’u përgjigjur.
“Presidenti paska ardh me bë pyetje dhe jo me dhanë përgjigje. A ju ka kontaktu presidenti i Turqisë Erdogan që të dëboni 6 shtetasit turq?”, pyeti ai.
Presidenti vazhdon të mos përgjigjet, ai po kërkon sërish të dihet për detajet e angazhimit të ekspertit.
