Me iniciativën e Shoqatës Humanitare “Forumi i Femrave Shqiptare”, dhe në bashkëpunim me Drejtorinë për Integrime Evropiane dhe Mirëqenie Sociale në Komunën e Mitrovicës, familja Begiqi 4 anëtarëshe nga Mitrovica bëhet me banesë të re.
Drejtoresha për Integrime Evropiane dhe Mirëqenie Sociale, Nazan Kërveshi, u shpreh falënderuese dhe vlerësoi lartë kontributin e dhënë nga kjo shoqatë.
Drejtoresha Kërveshi më tutje tha se kjo familje kishte një gjendje të rëndë sociale pasi që ata po përballeshin edhe me tezën e sëmurë dhe me tre fëmijë jetim, andaj kjo iniciativë sado pak do tua lehtësojnë jetën atyre.
“Duke marrë parasysh faktin se çështja e banimit për këtë familje ishte një sfidë e madhe ne u jemi shumë mirënjohëse kësaj shoqate, me anë të këtij veprimi u tregua qartë se femra për femrën gjithmonë ka qenë dhe do të jetë përkrahëse, prandaj është një ndjenjë e papërshkrueshme për ta”, shtoj ndër të tjerash drejtoresha Kërveshi.
Kjo nuk është hera e parë që kjo shoqatë ju del në ndihmë personave me gjendje të rëndë ekonomike, prandaj përfaqësueset e kësaj shoqate premtuan se do të vazhdojnë me iniciativa të tilla.
