Trajneri i Feronikelit, Zekirija Ramadani është shprehur i lumtur me fitoren e skuadrës së tij kundër Ferizajt, të shtunën.
Në përballjen, e cila u luajt në “Ismet Shabani”, goli i Kastriot Rexhës mjaftoi për t’ia siguruar një fitore 1-0 “Niklit”, në përballjen e cila u luajt në kuadër të çerek-finales së Kupës së Kosovës, shkruan Insporti.
Derisa tekniku i Ferizajt, Bylbyl Sokoli shpalosi frustrimin e tij me skuadrën pas ndeshjes, Ramadani ishte i lumtur me atë që pa në fushë nga futbollistët e tij.
“Më gëzon fakti tjetër, përveç fitores, që nuk e lejuam kundërshtarin për asnjë moment të na rrezikojë. Rastet humben, por shumë mirë është kur në fillim krijohen rastet, ne patëm raste të pastërta.
“E shënuam golin në minutat më të mirë dhe menaxhuam shumë mirë ndeshje. Mendoj se luajtëm me mend.”
Feronikeli tani i pret ndeshjet e nesërme të Kupës, për të mësuar kundërshtarin e ardhshëm.
