Ish-komandanti i UÇK-së, Sylejman Selimi, është intervistuar sot në Prishtinë nga Gjykata Speciale.
Këtë e ka konfirmuar vetë avokati i tij, Tomë Gashi, përmes një njoftimi në profilin e tij.
“Komandanti i Shtabit të Përgjithshëm të UÇK-së, gjeneral Sylejman Selimi i ftuar nga Gjykata Speciale sot ka dhënë deklaratën e tij në Prishtinë”, ka shkruar Gashi.
Ndërkohë për detajet e këtij intervistimi të Selimit, Gashi thotë se do të mbajnë një konferencë për media në orën 14:00.
Selimi ditë më parë në një intervistë ekskluzive për Pressing në T7 kishte thënë se ishte duke pritur që shumë shpejt të ftohej për intervistim nga Gjykata Speciale.
Deri tani Gjykata Speciale ka intervistuar disa figura të larta të Ushtrisë Çlirimtare të Kosovës, përfshirë këtu Sami Lushtakun, Rrustem Mustafën – Remin e të tjerë. /GazetaExpress/
