Gjykata Themelore në Gjilan ka aprovuar kërkesën e Prokurorisë Themelore të Gjilanit, duke i caktuar masën e paraburgimit prej 30 ditësh të pandehurit J. J..
I pandehuri më 01 janar 2019, rreth orës 00:10 minuta, në fshatin Selishtë të Komunës së Gjilanit, nga pakujdesia, me pushkën e tij të gjuetisë, të cilën e ka poseduar pa leje dhe autorizim, e ka larguar nga jeta bashkëshorten e tij, tani të ndjerën Z. J..
“Me këto veprime i pandehuri ka kryer veprat penale vrasje nga pakujdesia nga neni 181 dhe mbajtja në kontroll, posedim të paautorizuar të armëve nga neni 374 paragrafi 1 të Kodit Penal të Republikës së Kosovës (KPRK)”, thuhet në komunikatën e dërguar nga Gjykata Themelore në Gjilan.
Gjyqtari i procedurës paraprake, pas shqyrtimit të shkresave të lëndës, ka konsideruar se janë përmbushur kushtet ligjore për caktimin e masës së paraburgimit, pasi që i njëjti po të gjendet në liri, mund të arratiset apo fshihet dhe në këtë mënyrë do të pamundësohet rrjedha normale e procedurës penale.
“Palët kanë të drejtën e ankesës ndaj këtij vendimi në Gjykatën e Apelit” thuhet më tej nga Gjykata Themelore në Gjilan, njofton Klan Kosova.
