Fluturimet në aeroportin e Hanoverit në Gjermani janë anuluar për disa orë pasi një person arriti ta prishte rrethojën dhe të hynte me veturë në pistën e aeroplanëve. Incidenti ndodhi të shtunën rreth orës 15 e 40 minuta. Policia e ndaluan veturën dhe e arrestuan shoferin.
Gjatë hetimit të rastit, aeroporti u detyrua t’i anulojë të gjitha fluturimet, ndërsa situata normale u kthye në orët e mbrëmjes pasi u vërtetua se në veturë nuk kishte ndonjë objekt të rrezikshëm. Incidenti ndodhi vetëm një javë pas njoftimit të policisë gjermane për shtim të masave të sigurisë në aeroporte për shkak të rrezikut nga terrorizmi.
Policia ka thënë se nuk ka shenja që incidenti ka qenë i lidhur me qëllime terroriste dhe se janë duke hulumtuar se a ka qenë vozitësi nën ndikimin e substancave narkotike. Në fotografitë e publikuara shihet një veturë pranë një aeroplani dhe forcat e sigurisë që e kanë rrethuar atë. Raportohet se vetura kishte targa të Polonisë, por nuk është publikuar kombësia e shoferit.
Zyrtarët policorë njoftuan se fluturimet në aeroport rifilluan pas orës 20. Aeroporti i Hanoverit ndodhet 11 kilometra larg qendrës së qytetit. Ndonëse miliona njerëz udhëtojnë përmes tij çdo vit, ai nuk llogaritet në mesin e aeroporteve kryesore të Gjermanisë, shkruan “BBC”, transmeton Gazeta Express.
