Kryetari i Skenderajt, Bekim Jashari, ka bërë të ditur se përkrah nismën e ndërmarrë nga kryetari i Mitrovicës, Agim Bahtiri, për nënshkrimin e peticionit që kërkon bashkimin e Mitrovicës.
“Si kryetar i Komunës së Skenderajt, e përkrahu inicimin e procedurës për Ndryshim-Plotësimin e Ligjit, Nr. 03/L-041, për Kufijtë Administrativ të Komunave, me qëllim të bashkimit të qytetit të minatorëve, Mitrovicën, nismë kjo e ndërmarrë nga kryetari i Komunës, Agim Bahtiri.
Ka filluar edhe zyrtarisht mbledhja e nënshkrimeve në Mitrovicë, dhe ne si institucione lokale do ta përkrahim peticionin për bashkimin e qytetit”, ka shkruar Jashari.
Kujtojmë se gjatë ditës së djeshme ka filluar nënshkrimi i peticionit për bashkimin e Mitrovicës Jugore me atë Veriore.
