Majlinda Kelmendi, është rikthyer nga lëndimi në mënyrën më mbresëlënëse dhe frymëzuese të mundshme, duke e arritur finalen e Grand Slamit Abu Dhabi të shtunën.
Kampionia olimpike në xhudo nuk arriti të fitojë në finale ndaj italianes Odette Giuffrida në kategorinë -52 kilogram, pasi u dorëzua pas lëndimit që kishte në hundë.
Gjatë meçit, Majlinda kishte probleme me hundën e saj, të cilin e pësoi në çerekfinale dhe detyrohej që ta mjekonte vazhdimisht.
Kelmendi në gjysmëfinale e mposhti britaniken Chelsie Giles duke fituar me Ippon.
Ky ishte rikthimi i Majlindës pas lëndimit të gjatë që e mbajti jashtë aktiviteteve për 14 muaj.
Poashtu medalje të argjend ka fituar edhe Distria Krasniqi. Krasniqi pati mundësinë ta fitojnë medaljen e artë, por e humbi ndeshjen finale pasi u mposht nga mongolja Urantsetseg Munkhbat.
Ndërsa suksesin më të madh e arriti Nora Gjakova, e cili fitoi medaljen e artë në Grand Slam-in që po zhvillohet në Abu Dhabi.
Nora në finale e mposhti me ippon xhudisten nga Rusia, Anastasiia Konkina, në kategorinë deri -57 kilogramë.
Deri në finale Nora pati punë shumë të vështirë. Ajo e kaloi pa luftë rundin e parë, kurse në të dytin triumfoi kundër xhudistes nga Rumania, Loredana Ohai.
Në çerekfinale, Gjakova u përball me xhudisten franceze, Priscilla Gneto, duke triumfuar me Ippon për të siguruar gjysmëfinalen. Kampionia evropiane tregoi cilësi të madhe edhe kundër xhudistes nga Taipeh, Chen-ling Lien, duke e mposhtur gjithashtu me Ippon.
