Brikena Berisha nga Iniciativa Kosovare për Stabilitet e ka konsideruar s trend shumë shqetësues numrin e personave që këtë vit e kanë humbur jetën në vendin e punës – gjithsej 16, njofton Klan Kosova.
“Realisht ende nuk jemi në fundin e vitit 2018 dhe shifra thuajse e ka tejkaluar atë të vitit të kaluar, lëndimet janë shumë të larta por çka është më e dhimbshme është që edhe aksidentet me fatalitet këtë vit janë shumë të larta”, ka thënë Berisha në Info Magazine të Klan Kosovës.
“Deri tani diku 16 aksidente me fatalitet, 18 gjithsej por dy vdekje natyrore”.
“Me e marrë në proporcion, i bie që më shumë se një punëtor ka gjetur vdekjen në muaj këtë punë”.
Për Berishën kjo paraqet një trend shqetësues pasi që edhe shumica e viktimave ishin nën moshën 30 vjeçare.
“Trendi është pak a shumë i njëjti, gjendja është shumë shqetësuese por çka është më e dhimbshme me e krahasu me vitin e kaluar pak a shumë është mosha e të ndjerëve pasi që kemi më shumë se gjysmën nën moshën 30 vjeçare”, shtoi ajo, duke përmendur edhe rastin kur sivjet një djalosh nën moshën 18 vjeçare e humbi jetën në vendin e punës.
“Realisht është duke bërë bujë statistikisht shqyrtimi i këtyre fakteve por jo në praktikë nuk po del që kanë efektivitet”.
Ajo njoftoi se kjo Iniciativë ka realizuar një raport të ri ende të papublikuar, ku janë marrë me atë që ndodh pas vdekjes së këtyre punëtorëve, me ç’rast ajo pohoi se me familjet e atyre personave që kanë humbur jetën në vitin 2017 askush nuk e ka një pasqyrë të qartë se çfarë ka ngjarë me ta.
