Presidenti Thaçi është shumë i kënaqur me ekipin negociator të emëruar nga Qeveria, që në krye ka Fatmir Limajn. Raportet mes Thaçit e Limajt tashmë janë relaksuar dhe presidenti sot tha se ka besim në përvojën politike të ish-bashkëpunëtorit të tij, që për disa vite ishin kthyer ne armiq politikë.
Presidenti Hashim Thaçi gjatë një konference për media ka thënë se ka besim tek ekipi që e ka formuar Qeveria për t’iu bashkëngjitur atij në negociatat me Serbinë, të cilat deri tash i realizonte i vetëm.
“Kam besim që z. Limaj dhe te pjesa tjetër e ekipit se do t’i japin dinamikë të re me përvojën e tyre”, ka thënë Thaçi.
Thaçi ka komentuar edhe deklaratat e zyrtarëve serbë, përfshirë edhe Presidentin Aleksander Vuçiq, se nuk pranojnë të bisedojnë me Limajn në Bruksel.
“Nuk e bën seleksionimin Beogradi, por institucionet e Kosovës”, ka thënë Thaçi.
Ndërsa, pasi u propozua që të jetë kryenegociator, Limaj në Pressing të Televizionit 7, tha se ekipi u krijua për të mos e lënë krejt dialogun me Serbinë, në duar të Presidentit Thaçi.
Gjithashtu, Limaj tha se ai është prej njerëzve që më së shumti ka arsye të mos i bashkohet Thaçit, por se këtë po e bën që marrëveshja me Serbinë të mos bëhet vetëm nga një njëri.
E, Limaj, gjatë një interviste në vitin 2016, kur raportet me ish-bashkëpunëtorin e tij i kishte të acaruara, pati thënë se Thaçi i përulet atij që ia ka nevojën, ndërsa e hedh kur nuk i duhet.
“Hashim Thaçi është pa parime politike. Në politikë ai ka vetëm interesa, s’i intereson as majtas as djathtas. Nuk ka principe programore. Nëse ta ka nevojën të përkulet, nëse nuk i duhesh të shkatërron”, pati thënë Limaj në një deklaratë publike në nëntor të 2016-s.
Tash kur Thaçi e lartëson Limajn dhe përvojën e tij politike, duket se Limaj po i duhet, duke marrë parasysh se presidenti po refuzohej masivisht nga spektri politik në vend.
