Pas disa ditëve spekulime për trajnerin e Feronikelit në vazhdim të kampionatit kosovar, 24 orët e fundit ishin deçizive për ndryshimin e madh në krye të shtabit teknik të skuadrës nga Drenasi, shkruan “Sport-24h.net”.
I dëshiruar nga shumë tifoz të Feronikelit, Zekirija Ramadani sot gjatë ditës u zyrtarizua si trajner i ri (i vjetër) i skuadrës, duke pasuar Sulejman Starovën, më të cilin nuk ishin të kënaqur zyrtarët e klubit pas rezultateve të dobëta që nga koha e zyrtarizimit të tij si timonier në ekip.
Redaksia e “Sport-24h.net” vetëm pak çaste më herët kontaktoi trajnerin shkupjan Ramadani, i cili tha këto fjalë pas rikthimit të madh te Feronikeli.
“E njoh shumë mirë mjedisin te Feronikeli. Kam besim të madh tek futbollistët dhe me mbështetjen e kryesisë së klubit dhe tifozërisë mund të arrrijmë objektivin nëse të gjithë japim maksimumin”, tha fillimisht Ramadani.
Më pas “Zeka” foli edhe për skuadrat tjera, të cilat poashtu synojnë titullin e kampionit, por nuk deshi të përmendi emra.
“Respekt për të gjitha skuadra tjera në Superligë, por rival të Feronikelit për mua janë të gjitha skuadrat që synojnë titullin e kampionit”, tha Ramadani, ekskluzivisht për “Sport-24h.net”.
