Afër 38 milionë euro ia shpenzuan buxhetit të Kosovës Veteranët e Luftës, në vetëm gjashtë muajt e parë të këtij viti, kur ata filluan të paguhen rregullisht.
Numri i tyre nga muaji në muaj çdo herë ka shkuar duke u rritur, shkruan Gazeta inFokus.
Në janar të 2018’tës në listën e pagesave u regjistruan 36.794 veteranë e familjarë të tyre, por në muajin qershor ata u bënë 37.598.
Në bazë të të dhënave të siguruara nga Gazeta inFokus, çdo muaj Kosovës i janë shtuar së paku nga 100 veteran.
Edhe pse numri i veteranëve çdo herë është rritur, njëjtë nuk ka ndodhur edhe me shumën e paguar për ta.
Si shembull krahasimi mund të marrim muajt janar dhe shkurt.
Në janar numri total i përfituesve ishte më i vogël se në muajin shkurt, por megjithatë në janar u paguan rreth 36 mijë euro më shumë.
Për këtë çështje kanë një sqarim në Ministrinë e Punës dhe Mirëqenies Sociale.
“Ndryshimi nga muaji në muaj i totalit të pagesës ka ndodhur për shkak të pagesës retroaktive”, thuhet në përgjigjen e tyre.
Pensionet e veteranëve muajt e fundit ka qenë një temë e nxehtë diskutimi. Kjo më shumë për shkak të numrit të madh të përfituesve.
