Ekipi i vajzave të volejbollit nga SHMU “17 Shkurti” nga Banja e Malishevës janë shpallur nënkampione në kampionatin ballanik të volejbollit për grupmoshat U-15.
“Ndonëse kjo ishte hera e parë që një ekip nga Malisheva merr pjesë në këto gara, suksesi nuk ka munguar, falë angazhimit të vajzave dhe trajnerit të ekipit, Liridon Telaku”, thuhet në njoftimin e zyrës për informim të kësaj komune.
Pas suksesit të treguar, krahas shumë urimeve, nënkampionet e Ballkanit i ka uruar edhe nënkryetari i Komunës së Malishevës, Hajdin Berisha, dhe drejtoresha komunale për sport, Besartë Kryeziu-Ramaj.
“Sporti në komunën tonë është duke u zhvilluar shumë dhe në këtë vit sidomos me ekipet në grupmoshat e reja jemi duke treguar rezultate të jashtëzakonshme. Këto suksese sot u kurorëzuan me shpalljen nënkampione ballkanike në volejboll, duke na bërë krenarë ne si Malishevë por edhe si Kosovë”.
