Xhabir Zharku pritet që dita -ditës të zbarkojë në Kaçanik, pas 6 vjetësh largimi. Më nuk po e ndjek drejtësia dhe më nuk ka se kush ta ndal së vepruari. Megjithatë, a ka vend ai për të drejtuar sërish njërin nga bastionet e PDK’së? Kryesia e kësaj partie heshtin kur pyetën për fenomenin “Xhabir Zharku”. Edhe më tutje nuk mund të thonë prerazi nëse do ta pranojnë atë në PDK.
PDK’ja e ka zëvendësuar që moti Zharkun, së paku në strukturën partiake. Besim Ilazi, kryetar i tanishëm i Kaçanikut udhëheq në këtë komunë që nga shkuarja e Zharkut.
Derisa kaçanikasit nuk lëkundën në votën e tyre për PDK’në, siç duket, armiqësia në këtë komunë zhvillohet brenda llojit. Kryetari i tanishëm, nuk e ka në qejf paraardhësin e tij.
Xhabir Zharku mund të konsiderohet gjithçka tjetër pos se “një qytetar normal” i Kaçanikut. Në fakt ai ishte shumë larg të qenit edhe politikan normal. Megjithatë, kryetari i Kaçanikut thotë se Zharkun e sheh si “çdo qytetar tjetër”. As më afër e as më larg.
Ilazi e pret kthimin e Zharkut pa ndonjë lloj entuziazmi ndërsa e ka të rëndësishme ta theksoj se me ish-kryetarin e partisë nuk ka raporte të afërta.
“Si me çdo qytetar të Kaçanikut”, ka thënë Ilazi për Gazetën Express kur është pyetur se çfarë raportesh ka me kryetarin e atëhershëm të kësaj komune, që fitonte dikur bindshëm kundrejt kundërshtarëve.
Thuhet se Zharku dhe Ilazi nuk kanë pasur raporte të mira, ani pse vinin nga e njëjta parti. Madje, Ilazi mund të konsiderohet si trashëgimtar i padëshiruar nga Zharku, “lufta” e të cilëve pritet të vazhdojë me rikthimin e këtij të fundit.
“Meqenëse jemi duke i mbajt zgjedhjet e partisë, statuti përcakton se kush do të jetë anëtar, kështu që nuk do të jem unë ai që e përcakton vullnetin e askujt”, thotë kryetari që gëzon postin e të parit, tash e dy mandate.
Ai ka treguar se sanksionet vlejnë vetëm për të dënuarit, ndërsa për ata që janë liruar nga dënimet nuk parashihet ndonjë ndalesë për të qenë pjesë e degës së partisë. Me një fjalë, Zharku i ka dyer e hapura në PDK, nëse ai e do që rikthimi i tij pas gjashtë vjetëve të jetë kuptimplotë.
E gjashtë vite ikje dënimit me burg, erdhën kur vendi ku Zharku gjeti strehim, nuk pranoi të ekstradojë atë. Suedia, i qëndroi besnike qytetarit që aty kishte edhe disa biznese. Bizneset keq nuk i la as në Kosovë, edhe pse jashtë shtetit, ai ka ende bashkëpunëtorë të ngushtë e familjarë që kujdesen për të e të ardhurat e tij brenda shtetit.
Kryetari që njihet më së miri për sjelljen e “Pallmave” në Kosovë, do të shkaktojë trazira brenda bastionit të pathyeshëm të PDK-së, tash e 18 vite, Kacanikut.
E pavarësisht simpatisë që kanë kaçanikasit, njëjte nuk mendonjë nga Partia.
Të kontaktuar nga Gazeta Express, kryesia e PDK-së, nuk jep përgjigjet nëse Zharku është i mirëpritur në parti.
Ata kohë më parë kishin deklaruar se persona të tillë nuk kanë vend në struktura.
E pavarësisht kësaj, i kërkuari Xhabir Zharku nuk do të ketë probleme me drejtësinë.
Gjykata e Qarkut në Prishtinë, më 21 prill të vitit 2011 e kishte shpallur Xhabir Zharkun fajtor për kryerjen e veprave penale të detyrimit dhe posedimit të paligjshëm të armës, dhe i kishte shqiptuar atij dënim me tre vjet burgim si dhe gjobë prej 1,500 euro.
Ky vendim ishte vërtetuar nga Gjykata Supreme e Kosovës më 8 maj 2012. Por, edhe gjashtë muaj pas vërtetimit të dënimit të tij nga Gjykata Supreme e Kosovës, Zharku kishte qëndruar i lirë, edhe pse aktvendimi për ekzekutimin e vendimit nga Gjykata e Qarkut të Prishtinës në atë kohë kishte mbërritur në Gjykatën komunale të Kaçanikut.
/Express/
