Herolind Nishevci e ka fituar medaljen e artë në “Karate1 SERIES A – Salzburg 2018!”, që u mbajt gjatë kësaj fundjave në Salzburg të Austrisë, shkruan zeri.info.
Karateisti kosovar ka qenë i pakonkurrencë të dielën pasdite, në kategorinë +84 kilogramë, duke i mposhtur të gjithë kundërshtarët, një nga një.
Nishevci i mposhti pesë kundërshtarë, ndërsa në gjysmëfinale e shënoi një fitore tjetër të ëmbël, duke e mundur serbin Slobodan Bitevic.
Dhe, ai nuk dështoi as në finale, ku fitoi ndaj holandezit Tron Darnell për ta fituar medaljen e artë.
Duhet cekur se Nishevci kohë më parë e kishte fituar medaljen e bronztë në Kampionatin Botëror të karatesë.
Trajnerja e tij, Shqipe Zogiani është krenare me karateistin kosovar. “Krenare me garuesit e IPPON-it”, ka shkruar ajo.
Nishevci synon të arrijë suksese të vazhdueshme deri në vitin 2020, në të cilin e ka objektiv pjesëmarrjen në Lojërat Olimpike “Tokyo 2020”.
Ai është njëri prej sportistëve më të suksesshëm në sportin e pasluftës në Kosovë.
