Analisti politik, Nexhmedin Spahiu ka propozuar që stadiumi kryesor i Kosovës duhet të ndërtohet në Gazimestan, vendi ku priten dy autostradat kryesore, ajo Durrës-Nish dhe Shkup-Mitrovicë.
Sipas Spahiut, kjo është pika më e qasëshme për çdo qytet në Kosovë.
‘’Gazimestani është vendi ku priten dy autostradat kryesore të Kosoves (Durrës- Nish dhe Shkup- Mitrovicë), rrjedhimisht është pika më e qasëshme për çdo qytet e qytezë të Kosovës. Eshte vetëm 2 minuta vozitje larg nga Ambasada Amerikane në Prishtinë, mu pranë permendorës së Betejës së Kosovës’’, ka shkruar ai në Facebook.
Ditë më parë kryetari i PDK-së, Kadri Veseli tha se stadiumi duhet të ndërtohet në Drenas, deklaratë që pati shumë reagime.
Ndër ta ishte edhe kryetari i Prishtinës dhe kandidati edhe për një mandat, Shpend Ahmeti, i cili tha se stadiumi kryesor i çdo shteti është i ndërtuar në kryeqytet.
