Rreziku i uraganit ‘Irma’, sa vjen e bëhet edhe më i madh. Stuhitë e forta të erës janë duke goditur ishujt në jug të Floridas. Niveli i ujit vjen gjithnjë e më në rritje përgjatë gjithë brigjeve të Amerikës, ku priten stuhi edhe më të forta.
Rreth 6.3 milion njerëzve u është thënë të evakuohen, por guvernatori i shtetit është shprehur mbrëmjen e së shtunës se tani është shumë vonë për tu larguar. Deri më tani kanë humbur jetën rreth 24 persona, që prej ditës kur uragani goditi ishujt e Karaibeve.
Ajo ç’ka po i tmerron të gjithë, është fakti se ky uragan pritet të forcohet edhe më, duke u shndërruar kështu në një nga më të fuqishmit e regjistruar ndonjëherë.
Autoritetet kanë paralajmëruar për të tjera stuhi të fuqishme mëngjesin e sotëm, në jug të vendit dhe në Miami-n qendror.
“Nuk kanë mbetur dhe shumë orë. Stuhitë po afrohen. Nëse nuk shpejtoni tani, s’do të keni më kohë më pas.”- këto kanë qenë fjalët e guvernatorit Rick Scott.
Më mijëra njerëz aktualisht ndodhen pothuajse në kushte të pabanueshme dhe pa energji elektrike.
