Anëtari i Kryesisë së PDK-së, Naim Bazaj i cili është edhe kryesues i Kuvendit Komunal të Drenasit në një prononcim për KALLXO.com ka thënë se nuk do e përkrahë kandidaturën e Ramiz Lladrovcit për kryetar të Komunës.
PDK-ja ka vendosur që të kanididojë përsëri kryetarin aktual të Drenasit por me këtë nuk po pajtohet anëtari i kryesisë, Naim Bazaj, i cili ka vendosur të punojë haptas kundër zgjedhjes së Lladrovcit.
“Nuk po e dimë pse z. Veseli e ka kandidu Lladrovcin kur mezi e fituam herën e parë në balotazh edhe anëtarët e kryesisë shumica nuk ishin për të, aty për aty ai e vendosi. Na po e shohim që ai humbjen e ka edhe në Skenderaj edhe në Drenas, qashtu qysh e pat edhe në nivel të Kosovës, ku pat rënie të fuqishme”, tha Bazaj për KALLXO.com.
Madje Bazaj thotë se nuk është i vetëm në këtë rrugëtim, por se ka edhe shumë të tjerë që nuk do e përkrahin.
“Unë nuk do ta përkrah personalisht Lladrovcin e as shumë anëtarë të kryesisë nuk e përkrahin. I kemi lodhë edhe votuesit tonë kështu. Unë mendoj që PDK-ja do të humbë kësaj radhe, sepse nuk është i dëshiruar Lladrovci as nga qytetarët”, tha në mes tjerash Bazaj për KALLXO.com
I pyetur se pse nuk provoi që kësaj herë të dalë si kandidat i pavarur, Bazaj thotë se dëshiron të pushojë.
Ai nuk e përjashton mundësinë që grupi i tij që është kundër kandidimit të Lladrovcit ta përkrahë kandidaturën e Nismës për Kosovë në Drenas.
“Ne ende s’kemi vendosur se kë ta përkrahim në këto zgjedhje, por absolutisht nuk do e përkrahim kandidatin e PDK-së, çka do që kam elektorat e që më dëgjon, nuk e përkrahim. Ka prej tyre që do e përkrahin Nismën për Kosovë, unë personalisht do dal një ditë tjetër të tregoj se kë do e përkrahi, por nuk është larg asaj që e mbështesim edhe kandidatin tjetër”, tha tutje Bazaj.
Ai vazhdon të jetë anëtar i Kryesisë së PDK-së, ndërsa thotë se ditëve të ardhshme do të shohë se çka do ndodhë.
PDK-ja i ka cilësuar si dy bastione të saj Drenasin dhe Skenderajn. Mirëpo në zgjedhjet e jashtëzakonshme lokale që u mbajtën vitin e kaluar në Drenas, ajo u “detyrua” që për herë të parë të shkojë në balotazh, pasi që Nisma për Kosovën nuk e kishte lejuar të fitonte qysh në rundin e parë.
Ndërsa në këto zgjedhje PDK-ja nuk ka kandiduar fare në Skenderaj, me pretekstin se do e përkrahë kandidatin e pavarur për kryetar të kësaj Komune, e që është Bekim Jashari, djali i heroit Hamëz Jashari.
