Kryeministri Mustafa ngushëlloi Familjen Lladrovci dhe qytetarët e Kosovës pas ndarjes nga jeta të Muhamet Lladrovcit
Kryeministri i Republikës së Kosovës, Isa Mustafa, ka ngushëlluar Familjen Lladrovci dhe qytetarët e Kosovës pas ndarjes nga jeta të Muhamet Lladrovcit, Babait të Heroit të Kosovës, Fehmi Lladrovci.
Në telegramin e kryeministrit Mustafa thuhet:
E nderuara Familje Lladrovci,
Me pikëllim mësuam lajmin për ndarjen nga jeta të veprimtarit kombëtar Muhamet Lladrovcit – Bacit Tush.
Ai do të përkujtohet përherë për veprimtarinë e çmuar për lirinë e Kosovës, duke mos kursyer asgjë në këtë udhë të shenjtë.
Familja Lladrovci gjatë angazhimit të plotë në shërbim të çështjes kombëtare, i dha vendit dy prej heronjve më të mëdhenj të luftës çlirimtare, luftëtarët e paepur Fehmi dhe Xhevë Lladrovcin.
Andaj, qytetarët dhe shteti i Kosovës do t’i jenë përherë mirënjohës Bacit Tush dhe Familjes Lladrovci për angazhimin dhe kontributin e tyre të pakursyer.
E nderuara Familje Lladrovci,
Në emër të Qeverisë së Republikës së Kosovës dhe në emrin tim personal Ju shpreh ngushëllimet më të sinqerta për këtë humbje të madhe.
I lehtë i qoftë dheu i Kosovës!
