Festivali i muzikës elektronike e ka kallë nejen, bash në kuptimin e plotë të fjalës.
Më shumë se 22 mijë njerëz u evakuan pasi një zjarr kishte kapluar skenën në festivalin e muzikës “Tomorrowland” në Spanjë.
Fotot dhe videot e postuara në mediet sociale tregojnë mjaft qartë kaosin që shpërtheu, pasi zjarri pushtoi skenën dhe bëri që me mijëra t’ia mbathin.
Flakët e fuqishme përfshinë pjesën më të madhe të skenës kryesore, por fatmirësisht, asnjë person nuk është lënduar.
“Askush nuk vdiq sepse njerëzit u evakuuan duke ecur. Nëse ndokush vraponte, të tjerët i thoshin të mos e bënte sepse mund të formonte ndonjë tollovi dhe të shtypte njerëzit”, tregoi një pjesëmarrës i festivalit për CNN.
Organizatorët e “Tomorrowland” përmes një postimi në uebfaqen zyrtare thanë se zjarri u shkaktua nga një defekt teknik. Hetimet për zjarrin vazhdojnë.
Ndërkohë, fansat e shumtë të koncertit shprehën zhgënjimin e tyre për shfaqjen e humbur, ku do të dëgjonin artistë si DJ Steve Aoki, DJ Ingrosso dhe Afrojack.
“Tomorrowland” ka filluar të mbahet që nga viti 2005 dhe që nga ajo kohë është rritur për nga popullariteti. Në vitin 2013 biletat ishin shitur për një sekondë. /Insajderi.com
