Objekti i ri shkollës “Elena Gjika” në fshatin Makërmal, investim i Komunës së Skenderajt, po lëshon shtat dita-ditës. Ky projekt i rëndësishme për fëmijët e fshatrave Makërmal, Likoc i Ri dhe Polluzhë po ndërtohet me standarde evropiane dhe me dinamikën e paraparë, transmeton Drenica Press.
Me qëllim të realizimit sa më cilësor të punimeve në këtë projekt po bëhen inspektime të vazhdueshme nga organet kompetente mbikëqyrëse.
Inspektimin e punimeve në këtë objekt e ka bërë edhe Nënkryetari i Komunës së Skenderajt Fadil Nura i shoqëruar nga Kryesuesi i Kuvendit komunal Ismet Salihu dhe drejtori i Urbanizmit Driton Mulaj.
Nënkryetari Nura ka theksuar me këtë rast se investim në dije është investim për të ardhmen e vendit. Ai po ashtu është shprehur shumë i kënaqur që Komuna e Skenderajt po ndërton një objekt modern shkollor me buxhetin e saj vetanak.
Objekt i shkollës “Elena Gjika” është projekt që ka filluar të realizohet në pranverë dhe financohet nga Komuna e Skenderajt. Rëndësia e ndërtimit të këtij objekti është e veçantë sepse nxënësit e kësaj shkolle kanë mbajtur mësim në një objekt shumë të vjetër dhe pa kushte elementare për mësimdhënie dhe mësimnxënie cilësore.
