Ylli i Barcelonës, Neymar Jr përmes një postimi në Instagram ka falënderuar të gjithë pjesëmarrësit në turneun “Neymar Jr’s Five”, ndërsa në prapavijë shihen flamuri kombëtar dhe ai i Kosovës.
Pjesë e këtij turneu ishin edhe Kosova e Shqipëria, që ishin në mesin e 53 vendeve të botës, transmeton Koha.net.
“Jam i lumtur që futbollistët e 53 vendeve janë kënaqur duke luajtur në paqe. Dua t’i falënderoj të gjithë dhe më vjen që s’mund t’ua bëj ‘tag’ të gjithëve. Por në emër të të gjithëve që më kanë bërë të ndihem kaq i lumtur, iu falënderohem”, ka shkruar ai në Instagram.
Në këtë edicion të turneut “Neymar Jr’s Five”, që u zhvillua në Brazil, ishin pjesë 104,228 futbollistë, ndërsa më të mirët ishin ata të Rumanisë që u shpallën kampion.
Kosova në këtë turne u përfaqësua nga ekipi “Simpatikët”, me përbërje: Kastriot Kasumi (kapiten), Taulant Rusinovci, Berat Hamiti, Mergim Boshnjaku, Muhamed Gashi, Arbnor Vitia e Florent Avdyli.
Në këtë turne Kosova arriti të kualifikohet në çerekfinale, duke fituar ndaj Malajzisë me rezultat 1-0, dhe Japonisë 4-0, por u mposht nga kampioni, Rumania, 5-0.
Ekipi i Kosovës nesër do të jetë mysafir në emisionin “Sot” në KTV për të shpalosur detajet nga aventura e tyre në “Neymar Jr’s Five”.
