Shkak për këtë ishte bërë fillimi i renovimit të objektit të kësaj ndërmarrjeje – si kusht i BERZH-it për kredinë për blerjen e autobusëve të rinj.
Zhvillimi i aktiviteteve jashtë objektit të tyre, sipas kryeshefit të ndërmarrjes, Halil Mustafa, po krijon vështirësi për punëtorët.
Por, ai shton se nuk di se pse po vonohen punimet e as nuk ka informacione të detajuara për kontratën e renovimit të objektit, pasi punët e prokurimit janë kryer nga komuna.
Ndërsa shpreson që punët të përfundojnë më shpejt, pasi ardhja e kontingjentit të fundit prej 21 autobusësh varet nga renovimi i objektit.
Ai shpreh keqardhje edhe ndaj drejtuesve të shkollës, pasi thotë se ndonjëherë kanë mundur ta pengojnë procesin mësimor.
KTV-ja gjatë javës ka provuar të marrë ndonjë sqarim nga Komuna e Prishtinës, por ata nuk kanë dhënë asnjë të tillë.
Por, më 21 qershor, kjo e fundit ka ndarë edhe 166 mijë euro për një kontratë të re, për kryerjen e punëve shtesë.
Paraprakisht, në dhjetor ishte nënshkruar kontrata fillestare me operatorin ekonomik “NN PRISHTINA” për renovimin e objektit të Trafikut Urban, në vlerë 1 milion euro – prej nga shumica e parave kanë qenë grant nga BERZH-i.
Sipas kontratës fillestare, punimet e nisura para 6 muajsh është dashur të përfundojnë pas 60 ditësh, ndërsa ato të kontratës shtesë – të nënshkruar këtë javë – duhet të përfundojnë brenda 30 ditësh.
