Ish deputeti i Lidhjes Demokratike të Kosovës, Shpejtim Bulliqi ka reaguar ndaj kryetarit të Podujevës, Agim Veliu i cili tha se LDK ka humbur në fshatin e lindjes se Bulliqit.
Bulliqi në një përgjigje për ‘Indeksonline’, ka thënë se fajtore për rënien e LDK-së në Podujevë dhe humbjen e kësaj partie jo vetëm në fshatin Llugë, por edhe në një numër të madh të lokaliteteve në Llap është vet Veliu.
“Vet Veliu është fajtor për me politikat e tij linçuese e diferencuese ndaj atyre qe mendojnë ndryshe duke i përzgjedhur kandidatët për deputetë sipas preferencave të tija. Vota e qytetarëve merret duke ua lehtësuar jetën e tyre në projekte konkrete dhe me respekt të ndërsjellët, çdo ditë e jo vetëm në kohë fushatash. Andaj këto lokalitete të humbura kthehen me tjera politika jo me ato provinciale, polarizuese e linçuese”, ka thënë Bulliqi.
Ndryshe, Veliu ka paralajmëruar se pas certifikimit të rezultatit zgjedhor nga ana e KQZ-së, organet e LDK-së do të mblidhen dhe do të analizojnë procesin zgjedhor ku do të vendosin si do të veprohet tutje./Indeksonline/
