Lideri i Vetëvendosjes, Visar Ymeri ka shkruar se i ka treguar Përfaqësueses së Lartë të BE’së, Frederica Mogherini, se nuk lejojnë të humbë Kosova territor në këmbim të vizave. Ka thënë se s’bën të bëhet presion për shënimin e vijës kufitare pasi mund të sjell krizë të re në Kosovë.
“Kosova duhet t’i ketë kufijtë e vet të shenjuar. Por kjo duhet bërë sipas së drejtës publike ndërkombëtare dhe sipas parimit të paprekshmërisë së integritetit territorial të Republikës. Marrëveshja me Malin e Zi i cenon të dyja. Nuk bën të humbim territor. Duhet të insistojmë për trajtim të barabartë e dinjitoz. Imponimi sjellë krizë, shqetësim dhe indinjatë. Populli i Kosovës kërkon paqe, zhvillim e punë. Jo nënshtrim. Jo cenim territori. Jo mohim sovraniteti. Jo përdhosje dinjiteti. Këto ia sqarova edhe znj. Mogherini”, ka shkruar Ymeri, në një reagim pas ka takuar zyrtaren e BE’së.
Edhe në këtë takim, Ymeri ka thënë se ka dalë kundër dialogut pa kushte me Serbinë.
“Është edhe e padrejtë e edhe gabim që në raport me shqiptarët e veçanërisht me Kosovën të aplikohen kritere e kërkesa të cilat e kushtëzojnë pabarazinë mes popujve dhe nuk bazohen në parimin e reciprocitetit të marrëdhënieve e respektimin e ndërsjellë të sovranitetit mes vendeve. Nuk ka as dobi e as drejtësi nga një dialog me Serbinë që nuk bazohet as në parime të marrëdhënieve mes dy shteteve e as në parimin universal për lirinë e popujve”, ka shtuar ai.
Zyrtarja e BE’së sot ka takuar të gjithë liderët e Kosovës në një takim të përbashkët dhe ka kërkuar votimin e demarkacionit si kusht për liberalizimin e vizave.
