Ministria e Punës dhe Mirëqenies Sociale ka njoftuar se furnizimi i protezave për invalidët e luftës së UÇK-së do të fillojë të realizohet pasi që të formohet edhe komisioni mjekësor i cili do të jetë gati në ditët e ardhshme pas përfundimit të verifikimit të statusit për secilën kategori të invalidëve të luftës.
Në një përgjigje për IndeksOnline, Ministria e Punës dhe Mirëqenies Sociale ka treguar se aktualisht invalidët që marrin pensionin invalidor janë 3 mijë e 423 invalidë të UÇK-së dhe 1 mijë e 975 invalidë Civil të luftës.
“Komisioni mjekësor do të formohet pas përfundimit të verifikimit të statusit për kategorinë e invalidëve të luftës, kurse pensionin e invalidit të luftës aktualisht e marrin 3 mijë e 423 invalidë të UÇK-së dhe 1 mijë 975 invalidë civilë të luftës”, thuhet në përgjigjen e MPMS.
Ndërsa, në vitin që e lamë pas Qeveria e Kosovës ka ndarë për invalidët e luftës të UÇK-së shumën prej 150 mijë euro kurse për këtë vit ende nuk ka ndonjë vendim zyrtarë.
“Në vitin 2016 për nevoja të protezave të invalidëve të luftës së UÇK-së janë ndarë 150 mijë euro. Për vitin 2017 ende nuk ka ndonjë vendim se sa mjete do të ndahen për këtë qëllim”, thuhet më tej në përgjigjen e MPMS./IndeksOnline/Ardian Beka/
