Për t’i shtuar edhe më tej dyshimet në profesionalizmin e Prokurorisë dhe organeve tjera përgjegjëse për rastin, në Rubikon të KTV-së, ku Syla ishte i ftuar për të dhënë sqarime rreth vdekjes së mistershme të Deharit, kishte thënë se për vdekjen e Deharit ishte njoftuar rreth orës 14:00 të 5 nëntorit. Por, nga raporti zyrtar dihet se Astrit Dehari ishte dërguar në Spitalin e Prizrenit në orën 15:20, ku edhe është konstatuar vdekja e tij.
Sigurisht, nëse Hoxha nuk ka bërë ndonjë gabim për shkak të harresës, ky do të ishte edhe një skandal i radhës i Prokurorisë, meqë në ora 14:00 të 5 nëntorit, Dehari ishte gjallë ende, sepse dihet se koha e shëtisë në këtë qendër paraburgimi fillon pikërisht në ora 14:00.
Në ora 14:00, nga video-incizimet që kanë dalë nëpër media shohim se si gardiani i burgut kontrollon dhomën A3 kur nxjerr të mbajturit në pauzë – dhe kuptojmë se Astriti ishte gjallë, meqë refuzon të dalë nga qelia.
Por, kryeprokurori insistoi se ai ishte lajmëruar në atë kohë për vdekjen e Deharit, duke shtuar se kjo ka mundur të ndodh edhe më herët.
“Unë jam njoftuar nga drejtori i Qendrës së Paraburgimit në Prizren dhe jam njoftuar diku rreth orës 14:00, mos gabofsha. Por, të jem i sinqertë unë kam qenë jashtë qyetetit atë ditë, nuk kam qenë në Prizren. Ka mujt me thirrë edhe më herët ai ndoshta, sepse kam qenë në Prevallë, duke u kthyer, sepse ka qenë vikend”, kishte theksuar Hoxha në Rubikon të KTV-së.
Hoxha u kritikua edhe për deklaratën e tij decidive se Dehari është vetëvrarë pas prezantimit të raportit të autopsisë, përkundër faktit që raporti nuk e specifikoi vdekjen e tij si vetëvrasje dhe hetimet nuk kanë përfunduar ende.
Pas kritikave të shumta dhe skepticizmit për raportin e prezantuar, ministrja e Drejtësisë, Dhurata Hoxha iu drejtuar Ambasadës Britanike në Kosovë për një hetim të pavarur nga hetuesia britanike.
Ambasada nuk ka kthyer asnjë përgjigje ende, derisa rasti Dehari mbetet aktualisht ende i pazgjidhur. /Periskopi/
