NISMA për Kosovën, dega në Drenas, ka mbajtur sot tubim me strukturat dhe anëtarët e saj në Drenas, ku edhe është bërë prezantimi i kandidatit të NISMA për Kosovën, Isa Xhemajlaj, për të parin e Drenasit në zgjedhjet lokale që do të mbahen më 4 Dhjetor 2016.
Sipas këtij subjekti politik, të pranishëm në këtë tubim ishin edhe kryetari i Këshillit Kombëtar të NISMA’s, Jakup Krasniqi, kryetari i NISMA’s, Fatmir Limaj, sekretari Bilall Sherifi, deputetë dhe anëtarë të kryesisë së NISMA’s.
Kryetari i Këshillit Kombëtar të NISMA’s, Jakup Krasniqi, u ka bërë thirrje anëtarësisë së NISMA’s në Drenas, të punojnë maksimalisht në mbështetje të kandidatit Isa Xhemajlaj, për të cilin tha se jam mëse i bindur se do t’i sjelli ndryshimë Drenasit.
Krasniqi tha se Isa Xhemajlaj ka pasur rast dhe mundësi të rrëmbehet nga lakmia por asnjëherë nuk e pranoi, duke vazhduar të punojë si njeri i fjalëve të pakëta dhe punës së ndershme. Ai tha se këto zgjedhje janë rrjedhojë e një politike të gabuar të Hashim Thaçit, të cilën e ka kthyer në interes të tij personal dhe për këtë arsye jemi në një gjendje jo të mirë.
“Neve na vie keq që Drenica jeton në një paradoks. Bashkëluftëtaret e Thaçit, janë prapa grilave kurse, kriminel përtej urës e këndej urës janë duke u inkuadruar në Qeveri. A ka më paradoks, ata që kanë sjell lirinë burgosen e ata që kanë qenë kundër lirisë janë të lirë. Rasti më i dhimbshme është rasti i Drenicës 2”, tha Krasniqi.
Kryetari i NISMA për Kosovën, Fatmir Limaj, është shprehur se këto zgjedhje po vinë pa dëshirën dhe fajin e NISMA’s.
“Ne do dëshironim që në kushte normale të kemi zgjedhje, por fatkeqësisht politika e keqe na ka sjell këtu, ata duhet ta kenë kokën ulur për të bëmat e tyre, ka thënë gjatë fjalimit të tij, kryetari i NISMA’s, Fatmir Limaj.
Kryetari Limaj tha se Drenasit kjo parti po ia ofronë një njeri të drejtë dhe punëtor.
Ndërsa, kandidati për kryetar të Drenasit, nga radhët e NISMA për Kosovën, Isa Xhemajla, ka pohuar se së bashku do të punohet për një Drenas më ndryshe, për një Drenas, për të cilin është sakrifikuar me gjenerata të tëra.
