Sipas analistëve politikë deputetët duhet të insistojnë që të rishikohet çështja e Demarkacionit, pasi që sipas tyre është e qartë se ka pasur lëshime në përcaktimin e vijës kufitare në mes të Kosovës dhe Malit të Zi. Një opsion tjetër sipas analistëve është edhe dërgimi i kësaj çështje në Gjykatën e Arbitrazhit.
Njohësi i rrethanave politike Imer Mushkolaj, në një prononcim për Gazetën Blic në lidhje me çështjen e Demarkacionit, e ka vlerësuar s’i të nevojshme krijimin e një komisioni hetimor për ta shqyrtuar punën e komisionit shtetëror për Demarkacion.
“Së pari Kuvendi duhet të krijojë një komision hetimor, i cili do të shqyrtojë punën e komisionit shtetëror për demarkacion. Pastaj, Kuvendi duhet të propozojë zgjidhje konkrete për çështjen”, ka thënë Mushkolaj.
Një gjë e tillë sipas analistit Mushkolaj ka mundur të bëhet muaj më herët, por shkaku i kësaj vonese, kjo çështje duhet kthyer në fillim.
Kurse njohësi tjetër i rrethanave politike, Krenar Shala e ka cilësuar si fare të lehtë për ta gjetur zgjedhjen për çështjen e Demarkacionit.
“Çështja e demarkacionit është fare e lehtë për tu zgjidhur, nëse ekziston vullneti i palës Kosovare ashtu siç është vullneti i palës malazeze”, ka thënë ai.
Për ta shmangur krizën politike në vend sipas Shalajt, çështja e ndarjes së kufinjëve me Malin e Zi mund të arrihet përmes marrëveshjes se brendshme me kusht që dërgohet kjo çështje në Gjykatën Ndërkombëtare të Arbitrazhit.
“Çështja e Demarkacionit mund të zgjidhet përmes arritjes së marrëveshjes për ta derguar çështjen në Gjykatën Ndërkombëtare të Arbitrazhit. Ky veprim do të shmangte krizen politike në Kosovë dhe do t’ia hiqte pengesën e vënë nga shtetet anëtare të NATO-s për anëtarësimin e saj ne kuadër të procesit të ratifikimit nga shtetët anëtare”, ka përfunduar Shala.
