Ish-anëtarja e Lëvizjes Vetëvendosje, Ajnishahe Halimi, e cila së bashku me disa ish-anëtarë tjerë të VV-së formuan subjektin politik Fraksion Plus, e që tashmë i janë bashkëngjitur PDK-së, është bërë pjesë e rubrikës së citave ditore të gazetës prestigjioze amerikane, “The New York Times” (NYT).
“Njerëzit kishin nevoja, s’mbet kush pa iu bashkua atyre”. Ky është citati që kjo gazetë ka zgjedhur për citat të ditës, i cili është shkruar nga Halimi, raporton Koha.net.
NYT shkruan: “Ajnishahe Halimi, politikane në Kosovën tolerante, ku ndihma saudite shpesh ka ardhur me bishta, si kërkesa për të bartur perçe apo për të marrë pjesë në predikime në xhami”.
Kujtojmë se ishte Ajnishahe Halimi nga Skënderaj ajo që bashkënisi peticionin për mbylljen e xhamisë në Marinë të Skënderajt, xhami e cila dyshohej se po shfrytëzohej për aktivitete të shoqatës “Rahma/Mercy” nga imami i saj Xhemajl (Kastriot) Duka.
Kanë qenë pikërisht këto aktivitete, të cilat ngjallën dyshime te aktivistët për të drejtat e njeriut, të cilët, përmes një peticioni, kërkuan mbylljen e xhamisë dhe largimin e Kastriot Dukës, kërkesë e cila u shndërrua më pas në vendim të Kuvendit Komunal të Skënderajt, më 2 mars, 2010.
Ushtrimi ilegal i funksionit të imamit, keqpërdorimi i xhamisë për aktivitete jofetare deri në orët e hershme të mëngjesit, ardhja e mysafirëve të dyshimtë nga vende të ndryshme, manipulimi me të varfrit dhe bonjakët, e në veçanti me femrat e mitura, janë ndër arsyet që cekeshin në peticionin, i cili kërkonte largimin e Dukës.
