Kryeministri i Republikës së Kosovës, Isa Mustafa, ka udhëtuar për në Bruksel, ku do të takohet me udhëheqësit e Bashkimit Evropian.
Gjatë qëndrimit në Bruksel, kryeministri Mustafa, i shoqëruar nga zëvendëskryeministri i parë, njëherësh ministër i Jashtëm, Hashim Thaçi, dhe ministri i Integrimit Evropian, Bekim Çollaku, do të takohen me presidentin e Komisionit Evropian, Jean-Claude Juncker, presidentin e Parlamentit Evropian, Martin Schulz, komisioneren e lartë të BE-së për Punë të Jashtme dhe Politika të Sigurisë/zëvendëspresidente e KE-së, Federica Mogherini, komisionerin e BE-së, Dimitris Avramopoulos, eurodeputetët Ulrike Lunacek, Elmar Brok e Tonino Picula, si dhe zyrtarë të tjerë të lartë të BE-së e përfaqësues të bizneseve.
Gjatë takimeve, kryeministri Isa Mustafa do të kërkojë përkrahjen e mekanizmave të BE-së për Kosovën në proceset integruese, liberalizimin e vizave për qytetarët e Kosovës, si dhe përkrahje më të madhe të BE-së për zhvillimin e gjithmbarshëm të Kosovës.
Kryeministri Isa Mustafa dhe delegacioni qeveritar i Kosovës, po ashtu, do të shpalosin progresin që po arrihet në Republikën e Kosovës, reformat që po ndërmerren dhe orientimin e plotë të institucioneve dhe të qytetarëve të Kosovës për integrime evropiane.
