Policia e Kosovës e ka konfirmuar për Gazetën Blic vdekjen e një femre në QKUK.
Sipas zëdhënësit të Policisë së Kosovës për Rajonin e Prishtinës, Agon Borovci, dyshohet se 43 vjeçarja ka bërë vetëvrasje.
Ai i ka thënë Gazetës Blic se Policia ka marrë informatën se rreth orës 19:30 një person dyshohet të ketë bërë vetëvrasje.
“Nga informacionet e para që ka policia, dyshohet që: viktima femër, 43vjece, paciente në një nga klinikat e QKUK-së, per shkaqe ende të panjohura të ketë bërë vetëvrasje duke u hedhur nga një prej klinikave të QKUK-së. Policia menjëherë ka dalë në vendin e ngjarjes dhe ka filluar një hetim lidhur me rrethanat që mund të kenë sjellë deri te kjo ngjarje”, ka theksuar ai.
Gazeta më herët ka raportuar se është gjetur trupi i pajetë i një femre.
Sipas burimeve të Gazetës Blic ajo vuante nga depresioni, derisa kishte të shtrirë në QKUK edhe dy familjarë.
Ajo është nga Komuna e Drenasit.
