Në nënkalimin e stacionit të trenit në Olten, mbrëmjen e së shtunës është shkaktuar një zënkë në mes dy personave. Me këtë rast, njëri nga ta është lënduar rëndë nga goditjet me thikë, ndërsa sulmuesi i dyshuar është arrestuar në vendngjarje. Shkaqet dhe motivi i zënkës ende nuk dihen dhe janë nën hetim e sipër.
Të shtunën rreth orës 18.00, Policia Kantonale e Solothurnit është alarmuar me një informatë se në nënkalimin e stacionit hekurudhor të Oltenit është shkaktuar një zënkë në mes dy personave. Në vendngjarje kanë ardhur menjëherë disa patrulla policore, thuhet në një komunikatë të policisë, përcjell Albinfo.ch. Të parët në vendngjarje kanë arritur dy truproje sigurimi, të cilët kanë arritur të ndërmjetësojnë dhe ta ndalojnë zënkën, në të cilën njëri ka qenë i plagosur.
Autori i dyshuar, një shtetas 22-vjeçar i Kosovës, është ndaluar dhe më pas i është dorëzuar policisë. Për hetime të mëtutjeshme, ai është arrestuar përkohësisht. Viktima e plagosur rëndë është dërguar në spital.
Sipas hetimeve të deritanishme, atij i janë shkaktuar plagë me thikë. Shkaqet dhe arsyet janë duke u hetuar nga organet përkatëse. Policia zvicerane është në kërkim të dëshmitarëve.
