Kryeministri Ramush Haradinaj po vazhdon me shkarkime. Pas Komisionit për Demarkacion, shefi i ekzekutivit kosovar ka kërkuar nga vartësi i tij në Ministri të Arsimit që të shkarkojë bordin e Agjencisë së Akreditimit.
Kërkesa e Haradinajt përmban shkarkimin e menjëhershëm të Bordit të Agjencisë së Akreditimit, i cili funksionon në kuadër të Këshillit Shtetëror të Cilësisë, duke përfshirë këtu edhe ushtruesin e detyrës së drejtorit të Agjencisë së Kosovës për Akreditim, Fortuna Mehmetin.
Po ashtu, Haradinaj ka kërkuar nga ministri i Arsimit, Shyqri Bytyqi, që menjëherë të nisin procedurat për përzgjedhjen e anëtarëve të rinj të kësaj Agjencie.
Deri te ky vendim, sipas kërkesës së Zyrës së Kryeministrit për Ministrinë e Arsimit, ka ardhur duke parë se procesi i akreditimit deri më tash është zhvilluar me parregullsi serioze duke u shndërruar në objekt të shpeshtë të diskutimit publik.
Shkarkimi është konfirmuar për Gazetën Express nga një zyrtar i Qeverisë së Kosovës.
Fortuna Mehmeti nga viti 2015 ushtron detyrën e drejtorit të AKA’së, derisa bordi është drejtuar nga Blerim Rexha.
