Kryetari i Partisë Popullore Republikane (CHP), Kemal Kılıçdaroğlu ka qenë sot për vizitë në Shqipëri.
Vizita e kryeopozitarit turk nuk lidhej me çështje politike, por ai iu bashkua pelegrinazhit të bektashinjve në malin e Tomorit.
Kılıçdaroğlu ka mbërritur me avion në Tiranë dhe më pas ka udhëtuar me helikopter drejt Tomorit. Atje, ai ka mbajtur edhe një fjalim përpara të pranishmëve.
Gjatë pelegrinazhit, Kemal Kılıçdaroğlu është përshëndetur dhe është takuar me zyrtarë të lartë shqiptarë që ishin gjithashtu të pranishëm, si presidenti Ilir Meta dhe ministri i Turizmit, Blendi Klosi. Pjesë e pelegrinazhit u bë edhe Talat Xhaferi, kreu i Parlamentit të Maqedonisë së Veriut.
Mali i Tomorit është mbipopulluar këto ditë nga qindra-mijëra besimtarë të ardhur nga i gjithë vendi, diaspora dhe bota. Pelegrinazhi që zhvillohet nga 20 deri në 25 gusht kryhet për nder të heroit të Bektashinjve Imam Aliut.
